მსოფლიო ლოცვის დღის ჩვენი ყველა სამრევლოს ბავშვებთან ერთად აღნიშვნის იდეა წლების წინ გაჩნდა. რუსთავის საკვირაო სკოლის ბავშვები ამ ზეიმისთვის კარგად მოემზადნენ და ზიმბაბვეს სიმღერებით და აფრიკულ თემაზე შესრულებული ნამუშევრების გამოფენით შეგვეგებნენ. “სალიბონანი!” - ამ მიმართვით ესალმებოდნენ ბავშვები ერთმანეთს, ამ მიმართვით დაიწყო საოჯახო ღვთისმსახურებაც, რომელიც პასტორმა ირინა სოლეიმ ჩაატარა. ბავშვები ყურადღებით ისმენდნენ იესოს მიერ სნეულის განკურნების ბიბლიურ ისტორიას (იოანე 5:2-9), აღფრთოვანებულები მღეროდნენ უფროსებთან ერთად და ლოცულობდნენ. ზიმბაბვეს ერთ-ერთ ენაზე შესრულებული რიტმული, მხიარული ცეკვის და სიმღერის მერე მასპინძლები სიყვარულით მომზადებული მცირედი ხემსით გაგვიმასპინძლდნენ. მერე ბავშვებისთვის სუფთა ჰაერზე თამაშები გაიმართა, რის შემდეგაც ყველამ რუსთაველი ახალგაზრდა გიტარისტის ილია შონიას შესრულებას მოუსმინა. საზეიმო პროგრამის ბოლოს ბავშვებმა ნიღბები მოხატეს, რაც აფრიკული კულტურის მნიშვნელოვანი შემადგენელი ნაწილია.